Čestni wobydlerjo města Budyšina

Wot lěta 2002 wužiwa město Budyšin móžnosć, zasłužbne wobydlerki a zasłužbnych wobydlerjow, kotřiž ze swojim přikładnym wobydlerskim angažementom wusahuja a sej zasłužby wo dobro města a jeho wobydlerjow zdobychu, za swoje wukony wuznamjenić. Wobydlerjo a institucije móža wotpowědne namjety zapodać, kotrež měšćanska rada pruwuje a wo kotrychž potom rozsudźi. Najwjetše počesćenje za zasłužbnych wobydlerjow je spožčenje čestneho wobydlerstwa. Jeho zasady su so we "Wustawkach wo spožčenju čestneho wobydlerskeho prawa města Budyšina" w lěće 2001 wobzamknyli. Na tutym zakładźe so prěni raz w swjedźenskim lěće 2002 zasłužbne wosobiny z tutym wuznamjenjenjom česćowachu.

Čestny měšćan Christian Schramm

Christian Schramm narodźi so 3. meje 1952 w měsće Burgstädt w srjedźnej Sakskej, hdźež wón wotrosće a po zakónčenju šule powołanje tružerja nawukny. Po tutym wukubłanju studowaše na Fachowej wysokej šuli w Moritzburgu nabožnu pedagogiku. Lěto 1974 bu za njeho započatk skutkowanja w měsće Budyšinje. W samsnym lěće dósta w ewangelskej wosadźe swj. Pětra přistajenje jako diakon za młodźinske dźěło. Tomu přizamkny so pozdźišo wjacelětna dźěławosć jako wobwodny katechet w Budyšinje.

Lěta 1989 sta so Christian Schramm ze załoženskim čłonom tudyšeho Noweho foruma. Forum bě sej změnu NDR jako cil předewzał, dokelž wobhladowachu załožerjo mj. dr. komunikaciju mjez statom a towaršnosću jako mylenu. Mjenowany zaměr wjedźeše k tomu, zo bu Nowy forum ze strony NDRskeho knježerstwa jako statej njepřećelski zastopnjowany a so pod kontrolu statneje bjezstrašnosće staji. Najebać tutoho wosobinskeho stracha pokročowaše Christian Schramm swoje skutkowanje we wobydlerskim hibanju a přinošowaše z tym rozsudnje k nowowutworjenju swobodneho demokratiskeho porjada w našim kraju. Hižo w lěće 1990 wolachu jeho Budyšenjo mj. dr. připóznawajo jeho angažement z wulkej wjetšinu za měšćanostu resp. wyšeho měšćanostu. Zastojnstwo to, kotrež měješe do lěta 2015 bjez přetorhnjenja wukonjeć.

Pod jeho wjednistwom bu město Budyšin w dźensnišej formje natwarjene. Tole nastupa městotwarske noworjadowanje runje tak kaž wobłuk hospodarskeho wuwića. Twarjenja stareho města w zamołwitosći Budyskeho zarjadnistwa buchu z pomocu akwirěrowanych spěchowanskich srědkow a wotpowědnych swójskich srědkow wobšěrnje saněrowane. Areal Žitnych wikow dožiwi z wottorhanjom wysokodomu a stareje šule kaž tež z nowotwarom Centera na Žitnych wikach impozantne nowowuhotowanje. W zwisku ze saněrowanjom stareho města formowaše so tu nowe wobličo města.

Wot spočatka jeho skutkowanja tworješe w Šramowym dźěle saněrowanje šulskeje a pěstowarskeje krajiny wažne ćežišćo. Tule docpě so prjedy hač w druhich městach a gmejnach twarski staw, kiž za hladanje a kubłanje dźěći a młodźiny dobre wuměnjenja stwori a zastatk w saněrowanju předchadźacych lětdźesatkow nachwata.

 

Hdyž město do saněrowanja twarjenjow tak wobšěrnje inwestuje, dyrbja pak so najprjedy zakłady we wobłuku hospodarstwa wutworić, zo by so to z wotpowědnymi dawkowymi dochodami finansować hodźało. W tym zmysle woznamjenješe natwar industrijowych teritorijow Budyšin-Słona Boršć a Budyšin-Sewjer dalše ćežišćo dźěła za wyšeho měšćanostu Christiana Schramma. Mjenowanej terenaj wudospołništej so ze štyrjomi přemysłowymi přestrjenjemi resp. přemysłowymi parkami w měsće. Tak so wobšěrne wuměnjenja wutworichu, zo móžachu wjace hač 24.000 dźěłowych městnow nastać a Budyšin předstaja so tuž w regionje jako najwažniši wobstatk dźěłowych wikow.

Jeho skutkowanje njeje jenož we wobłuku města trajnje čujomne. Wot 2001 do 2016 zastawaše Christian Schramm zastojnstwo prezidenta Sakskeho měšćanskeho a gmejnskeho sejmika a zastupowaše z tym zajimy komunow napřećo Swobodnemu statej a Zwjazkej. Wyše toho zasadźowaše so w funkcijomaj

 Swoje skutkowanje staja Christian Schramm čas žiwjenja do słužby towaršnosće. Na njesebične wašnje je so wón wuspěšnje za nowowuhotowanje Budyšina a za dalewuwiće města zasadźał. Při tym so jemu poradźi, wuznam a nahladnosć našeho města tež za jeho mjezami powjetšić. Tole wšitko woznamjenja žiwjenski skutk, kotryž so z čestnym wobydlerstwom města Budyšina hódnoći.

Lisćina čestnych wobydlerjow města Budyšina

Za čestnu wobydlerku resp. čestneho wobydlerja města Budyšina buchu dotal pomjenowani:

Knjez Jan Buck (1922–2019)
Za čestneho wobydlerja pomjenowany w lěće 2007.
Biografija Jan Buck

Knjeni Helga Schwarz (1928–2014)
Za čestnu wobydlerku pomjenowana w lěće 2002.
Biografija Helga Schwarz

Knjez dr. Siegfried Seifert (1936–2013)
Za čestneho wobydlerja pomjenowany w lěće 2002.
Biografija dr. Siegfried Seifert

Knjez Herbert Flügel (1908–2007)
Za čestneho wobydlerja pomjenowany w lěće 2006.
Biografija Herbert Flügel

Lisćina čestnych wobydlerjow města Budyšina do 2002

1895: Hermann von Salza und Lichtenau (1829–1915), swobodny knjez, wokrjesny hejtman Budyšina

1895: Otto von Bismarck, rajchski kancler

Gertrud Bobek (1898–2000), politikarka (KPD/SED), něhdyša statna sekretarka a zastupowaca NDR-ministerka za ludowe kubłanje 1954 do 1958, čestne wobydlerstwo skónčene