ESF-spěchowanje Budyšin-Strowotna studnja

Wuměnjenje za přiwzaće do programa za Trajnoskutkowne socialne wuwiće města – ESF 2014-2020 běše zdźěłanje teritorialneho integrowaneho jednanskeho koncepta. Z wobzamknjenjom měšćanskeje rady k přesadźenju „Teritorialneho integrowaneho jednanskeho koncepta Budyšin-Strowotna studnja k spěchowanju štwórće w ramiku směrnicy Trajnoskutkowne socialne wuwiće města ESF 2014-2020“ zapoda město Budyšin próstwu wo přez ESF spěchowany ramikowy projekt za měšćansku štwórć Strowotna studnja.

Docpěć maja so koordinowane a splećene zhromadne dźěło socialnych nošerjow a druhich akterow měšćanskeje štwórće, stabilizowanje a polěpšenje situacije na městnje ze zaměrom, zwjazanosć wobydlerjow rozdźělnych socialnych skupin spěchować a z tym tež dołhodobnje atraktiwitu měšćanskeje štwórće pozběhnyć.

Z přiwzaćom do spěchowanskeho programa móžeja so do lěta 2021 kubłanske, wothladowanske a přistajenske naprawy financielnje podpěrować.

Po zakónčenju wjaceschodźenkoweho próstwoweho postupowanja su so sćěhowace projekty zahajili:

• přewod programa/koordinacija

jako přewodźaca naprawa cyłkowneho procesa – wobsahowy přewod a poradźowanje projektowych nošerjow při stajenju próstwow a modalitach wotličenja kaž tež koordinacija cyłkowneho procesa.

Projekt wobroća so na dźěći, młodostnych a młodych dorosćenych. Cile su mj. dr. spěchowanje zakładnych kompetencow (kaž na př. kreatiwita, motiwacija, dźěło w teamje) za přihotowanje na powołansku kwalifikaciju a zastup do dźěłowych wikow. Nimo toho maja so wšelake dźěłowe kročele za zdźěłanje swójskich fotowych/wideowych přinoškow a k přihotowanju wobsahow w interneće zeznać. Wyše toho matej so sylniša identifikacija wobdźělnikow ze swojim žiwjenskim a bydlenskim wobswětom kaž tež zwěsćenje nahladow wobydlerjow na měšćansku štwórć Strowotnu studnju docpěć.
Dalše informacije namakaće tule: www.leuchtturm-majak.de/Gesundbrunnen

• Natwar samoorganizacije wobydlerjow
  Docpěć ma so integracija cilowych skupin wo nazhonjenjach samoskutkownosće we wšědnym dnju. Přez zapřijeće a poćahowanje na indiwiduelne žiwjenske situacije ma so motiwacija za swójske jednanje zesylnić. W demokratisce naročnym procesu ma w běhu projekta samonošna organizacija w měšćanskej štwórći Strowotna studnja nastać, w kotrejž so akterojo měšćanskeje štwórće a wobydlerjo/wobydlerki wo zhromadnych zajimach nastupajo wuwiće štwórće dorozumjeja a za wotpowědne wuwićowe procesy angažuja.

• Cyłožiwjenske wuknjenje
  Zaměry projekta su sposrědkowanje kubłanskich a komunikaciskich kompetencow za staršich a za dźěći, zesylnjenje socialnych kompetencow a z tym docpěće sensibilizowanja mjez rozdźělnymi kulturami a narodnosćemi. Tuta naprawa měri so zasadnje na wšěch ludźi z měšćanskeje štwórće Strowotna studnja, předewšěm na wróćo stajene swójby z dźěćimi a młodostnymi, na samokubłacych, swójby migrantow kaž tež wšitkich zajimowanych. Docpěć maja so lěpša wuměna a komunikacija mjez ludźimi z a bjez migrantiskeho pozadka přez interakciju a zhromadne aktiwity a z tym spěchowanje tolerancy a demokratiskich hódnotow.

• Poradźowanje při migraciji I
  Zaměr projekta je, zo bychu so připóznaći požadarjo/připóznate požadarki wo azyl, ćěkancy, wróćo stajeni migranća/wróćo stajene migrantki a jich dźěći k samostatnemu jednanju we wšěch wobłukach wšědneho žiwjenja wukmanili. To ma so docpěć přez wšelake poskitki poradźowanja, přewodźenja a podpěrowanja. Poskitki hodźa so po wotewrjenych strukturach („pój a dźi“) a po zawrjenych poskitkach za skupiny (na př. kursy, workshopy) a spěchowanje čestnohamtskich kmótřistwow rozeznawać.

• Poradźowanje při migraciji II (pokročowanje)

• Interkulturelne kubłanje za dźěći a młodźinu
  Projekt „A.1.1 Dźěło z dźěćimi a młodostnymi w MGH Strowotna studnja – zhromadnje zmysłapołnje wuhotować“ je so w oktobrje 2020 zahajił.
  Cilowa skupina su wróćo stajene dźěći a młodostni w spěchowanskej kónčinje Strowotna studnja.
  Přez poskitk ma ke skrućenju dźěći a młodostnych dóńć, zo bychu najebać swójbne deficity swójske přeća sćěhowali a swójske zajimy a swójsku indiwidualitu wuwiwali. Zwonkašulski poskitk so wot socialnych dźěłaćerjow nawjeduje a zaběra so na př. z temami zahrodkowe dźěło, trajna skutkownosć a zadźěwanje wotpadkow, Zhromadnje smy sylni – Zwjazanosć spěchować, pomoc při domjacych nadawkach a wjele wjace.

• Kwartěrowy management
  Kwartěrowy management ma cyłkowny proces moderěrować a koordiněrować. Přez
  kwartěrowy management nastanje centralne kontaktowe a zetkawanske městno za wobydlerjow měšćanskeje štwórće.
  Zdobom maja so po stronje towarstwow resp. akterow stabilne a trajnje skutkowne syćowe struktury stworić a pohłubšić. Poskitki akterow na městnje maja so wyše toho wjazać a přewodźeć.
  Dalše nadawkowe polo je organizacija, instalacija a hajenje informaciskeho, zjawnostneho a imageoweho dźěła.
  Dźěło kwartěroweho managementa je dale na to wusměrjene, z wobydlerjemi, akterami a nošerjemi na městnje a tež zwonka měšćanskeje štwórće zhromadne zrozumjenje wo wuwiću štwórće kaž tež zamołwitosć za swójski kwartěr Strowotnu studnju docpěć.

• Kompetency přez sport
  Projekt „Kompetency přez sport“ wobroća so wosebje na dźěći, młodostnych a młodych dorosćenych. Wón je wusměrjeny mjez druhim na zdźerženje a polěpšenje powšitkowneje ćělneje, psychiskeje a socialneje wukonliwosće, na zadźěwanje chorosćam pola dźěći a młodostnych, na wuwiće indiwiduelneho zawěsćenja strowoty a na zesylnjenje začuća sebjehódnoty a kmanosće samoorganizacije.