Město Budyšin je sej nowy wodźacy wobraz dało. Tón wottykuje wuwićowe cile za zhromadne žiwjenje a wizije we wobłukach kaž hospodarstwo, socialne, kubłanje, kultura, wobswět, integracija a wěstosć. Z tym twori wodźacy wobraz 2030+ zakład za dalše wuwiće města Budyšina. Wudźěłany bu wón w intensiwnym procesu wobdźělenja, kotryž je wobydlerki a wobydlerjow z rozdźělnymi zajimami hromadźe zwjedł, zo bychu přeća, cile, wizije za Budyšin postajili.

Město je so w poslednich lětach jara derje wuwiło: Ličba k socialnemu zawěsćenju winowatych přistajenych je nadpřerěznje wysoka a Budyske firmy wuhospodarjeja wyši wobrot hač předewzaća w Drježdźanach, Lipsku abo Zhorjelcu. Budyšin ma nimo toho jednu z najwyšich kwotow dojězdźowarjow na dźěło we wuchodnej Němskej. Ličba bjezdźěłnych je so wot 2005 społojcowała.

Paralelnje k tutomu pozitiwnemu hospodarskemu wuwiću pak ličba wobydlerjow wot lěta k lětu lochko spaduje. Tohodla budźe z hłownym nadawkom přichodnych lět, tutón trend wobroćić. Wosebje w Budyšinje bydlacy 18- do 40-lětni dyrbja so sylnišo w regionje dźeržeć.

Ćežišća wodźaceho wobraza 2030+ su:

  • Strukturna změna we Łužicy
  • Budyšin jako zastaranski centrum regiona
  • Młode swójby jako cilowa skupina zarjadniskeho jednanja
  • Aktiwne wuhotowanje demografiskeje změny
  • Wutwar hospodarskeho stejnišća Budyšin