Budyšin dóstanje nowe wrota do Stareho města. Pytanje za parkowanskim městnom słuša do zašłosće, dokelž wostanje wobchad zwonka města. Při Hrodźišku daće dnjej njenapjeći wuklinčeć, grilujeće a swjećiće na wobydlerskej łuce.

Předstajće sej, po filigranym mosće dóńdźeće do Stareho města, direktnje nad Sprjewju! Puć dotam začuwaće kaž krótkodowol.

Předstajće sej, historiska twarska substanca so zdźerži a napjelni so z nowym žiwjenjom.

Předstajće sej, za někotre mjeńšiny sće we wutrobje Budyšina – w žiwym Starym měsće z wobchodami, hosćencami a městnom za zabawu abo dźěło.

Što sej mysliće?

Wobdźělće so na diskusiji!

W zašłych měsacach je so pruwowało, hač je twar mosta nad Sprjewinym dołom technisce zwoprawdźomny a ze škitom pomnikow zjednoćomny. 15. julija buchu měšćanskej radźe Wuslědki studije praktikabelnosće prezentowane. Nic jenož krajny rada je zahorjeny.

„Sym přeswědčeny, zo wunjesu tajke naprawy, kotrež su wizionarne, za město Budyšin jara wjele“, zjima Michael Harig předstajenje studije praktikabelnosće. Přetož ideja wobpřijima mjeztym wjace hač jenož móst: Historiske stare město by dóstało při zwoprawdźenju projekta nowy zachodny portal a jeho hódnota by so powyšiła. Zdobom by pytanje za parkowanišćom w historiskim centrumje do zašłosće słušało – přetož wot rozšěrjeneho parkowanskeho areala na Schliebenowej by so do historiskeho stareho města přez přidatne přeprěčenje Sprjewje spěšnje dóšło. K tomu eksistuja nowe ideje za wužiwanje Hrodu.

Krajny rada Michael Harig bě hromadźe z intendantom Němsko-Serbskeho ludoweho dźiwadła, Lutzom Hillmannom, na posedźenje měšćanskeje rady přišoł, zo by najnowši staw planowanja zhonił. Zastupjerjo architekturneho běrowa „Ehrlich Architekća zwr“, kiž měješe nadawk k wudźěłanju studije praktikabelnosće, předstajichu swoje wuslědki. Jich podpěrachu inženjerojo z hłowneho partnerskeho běrowa „Hentschke twar tzwr“ kaž tež fachowy planowanski běrow za mosty w Berlinje.

Wot januara su planowarjo zhromadnje na studiji praktikabelnosće dźěłali. Po tym zo bu kónc lěta 2019 znate, zo njehodźi so Sprjewja mjez Hrodom a Hrodźiškom z mostom ze spjateho betona (Spannbandbrücke) přeprěčić, přepytowachu woni alternatiwne warianty. Wobswětlene buchu tři wšelake typy mostow kaž tež tři wšelake dochadne scenarije.

Prěni raz je so móžnosć dochada w dołhim domje přepytowała. Tuta warianta ma rozsudne lěpšiny: Wona skići móžnosć, historisku twarsku substancu wotkrywać a znowa wužiwać. Přetož dołhi dom a hrodowa wodowa wěža – jako dźělej Hrodu – stej tuchwilu w rozpadowacym stawje a njejstej za zjawnosć přistupnej. Wobaj dźělej twarjenjow byštej so při twarje mosta restawrowałoj a za nowe wužiwanje přihotowałoj. Myslić hodźi so na přikład na rozšěrjenje poskitka Němsko-Serbskeho ludoweho dźiwadła kaž tež na wotewrjenje „Sky-bary“ na wodowej wěži Hrodu.

Jeli so tutón dochadny scenarij dale sćěhuje, móže so z wizije přidatneho přeprěčenja Sprjewje realita stać. Přetož tutón naćisk je namakał na rozsudnym městnje přihłosowanje: Krajny konserwator, na kotrehož so planowarjo a měšćanske zarjadnistwo w zašłych tydźenjach ze stajnje najaktualnišim planowanskim stawom wobroćichu, podpěruje móžnosć dochada w t. mj. dołhim domje. Nimo přistupnjenja historiskich twarjenjow přinjese tuta opcija dalšu, rozsudźacu lěpšinu. Tak powjedźe 120 metrow dołhe přeprěčenje rěki při dochadźe w dołhim domje jenož přez njewobtwarjeny teren.

W zašłych měsacach njebuchu jenož wšelake dochadne scenarije wobswětlene, ale tež wšelake typy mostow. Při tym so wukopa: Předstajomny by był twar wisateho mosta. Warianta wobłukoweho mosta wšak njenamaka pola krajneho konserwatora přihłosowanje. Planowarjo a politiscy akterojo pak zahorjeja so přede wšěm za třeću wariantu: za moderny tykowany móst.

Podpěru nazhoni projekt, kiž so najprjedy wot rady a zarjadnistwa města Budyšina zastorči, mjeztym tež wot Budyskeho wokrjesa. „Smy jara na tym zajimowani, zo so za nowy móst rozrisanje namaka“, wujasni Michael Harig na posedźenju měšćanskeje rady.

W zjawnosći je so prašenje za móžnymi kóštami hižo často diskutowało. Planowarjo pokazachu na to, zo je trochowanje tuchwilu njesměrnje ćežke. Njewotwisnje wot so pak dóńdźechu inženjerojo a architekća k prěnjej kalkulaciji. Tak bychu za twar mosta móhli městu nastać kóšty wot něhdźe 5 do 7 milionow eurow. Za wotkrywanje dołheho domu a hrodoweje wodoweje wěže, inkluziwnje natwara lifta, bychu so dalše 4,5 do 5 milionow zaplanować dyrbjeli. Měšćanske zarjadnistwo a wokrjes ličitej z wobšěrnym spěchowanjom za cyłkowny projekt. „Sym optimistiski, zo namakaja město, wokrjes a swobodny stat zhromadnje rozrisanje, kotrež je hospodarsce zastupujomne“, wočakowaše krajny rada.

Nětko wočakuja so přichodne kročele. Financielne srědki, kotrež su w měšćanskim etaće zaplanowane, so zasadźa, zo bychu so dalše planowanske wukonjeja wupisali. Potom so mjez druhim faworizowany tykowany móst jako konstrukcija dale optiměruje. Hdyž je trjeba, so dalše warianty přepytuja.

Kontaktujće měšćanske zarjadnistwo z e-mail: buergerbeteiligung(at)bautzen.de abo z póštu: Měšćanske zarjadnistwo Budyšin, běrow wyšeho měšćanosty, Mjasowe wiki 1, 02625 Budyšin.