Helga Schwarz narodźi so 1928 w Budyšinje. Po studiju na Lipšćanskej Wysokej šuli za hudźbu a eksternje wotpołoženeho statneho eksamena w matematice běše wona wot 1953 do 1988 wučerka za hudźbu a matematiku na Rozšěrjenej wyšej šuli "Friedrich Schiller" w Budyšinje. Tule załoži wona 1953 do dźensnišeho wobstejacy chór Friedricha Schilleroweje šule. Přez wjacore lěta organizowaše wona nadregionalnje wuznamne seminary za chórowych nawodow.

W swojej lětdźesatki trajacej dźěławosći jako wučerka hudźby je wona generacijam šulerjow lubosć k hudźbje posrědkowała a z njewšědnym angažementom k tomu přinošowała, zo by so humanistiska hudźbna kultura tež w časach dale njesła, kotrež druhe ideologiske ćežišća sadźachu. Jeje šulerjo dopominaja so hišće dźensa na jeje wučbu, kotraž bě do dalokeje měry bjez ideologiskich směrnicow tutoho časa, a bě tuž tehdom markantne wuwzaće.

Wona bě nimo nadawkow w šuli hudźbu tež stajnje do zjawneho ruma nosyła a pódla poprawnych šulerskich koncertow dalše wustupy realizowała (na př. "Judas Maccabäus", "Bastien und Bastienne", Wagnerowy koncert), zdźěla ze znatymi solistami. Po jeje pensionowanju bě so dale za hudźbne a kulturne žiwjenje města Budyšina angažowała. Wona přewza za čas wakancy za nimale dwě lěće nawod Budyskeje hudźbneje šule. Při tym bě wona tutu, za muzikaliske kubłanje tak wažnu instituciju runje w ćežkich časach přewróta wokoło wšěch strachow wjedła.

W meji 1997 běše wona sobuzałožerka załožby za Tuchorsku cyrkej, kotrejež předsydka wona wot toho časa z krótkim přetorhnjenjom bě. Tuta załožba je so bytostnje při wuchowanju rozpadowaceje Tuchorskeje cyrkwje a při restawrowanju renesansneho portala angažowała. Wězo bě wona tež tule rozsudnje při organizaciji beneficnych koncertow wobdźělena. Wona bě čłonka hudźbneho wuběrka ewangelsko-lutherskeje wosady a aktiwna w ewangelskim tachantskim chórje.