Serbske tradicije a nałožki k najwšelakorišim składnosćam su do dźensnišeho žiwe wostali a so husto tež wot němskeho wobydlerstwa přewzali.

Ptači kwas

Daloko rozšěrjeny je Ptači kwas, jedyn z najwoblubowanišich nałožkow mjez dźěćimi. 25. januara rano staji so taler na woknowu desku, kotryž so ze słódkosćemi a wosebitym pječwom pjelni. To su symboliske dary ptačkow, kotrež na tutym dnju kwas swjeća a so pola dźěći za rozsypanu picu na zymnych zymskich dnjach podźakuja. Ptači kwas so w mnohich pěstowarnjach a šulach we Łužicy swjeći, při čimž w někotrych kónčinach dźěći kwasarjow w ludowej drasće, najbóle w tej katolskich Serbow, předstajeja.

Jutrowne jěchanje

Tuta žiwa tradicija so w Budyšinje a hižo lětstotki pěstuje. Z přetorhnjenjemi wšelakich wobstejnosćow dla je jutrowne jěchanje w dźensnišim času kruty wobstatk w žiwjenju serbskeje katolskeje wosady w Budyšinje. Kóžde lěto njesu wjace hač 50 křižerjow na swojich konjach jutrowne poselstwo daloko do Budyskeho kraja. Na swojim procesionje do susodneje wosady Radworja a na wróćopuću so křižerjo modla a spěwaja w serbskej rěči wo zrowastanjenju Chrystusa. Serbske jutrowne jěchanje w Budyšinje, ale tež we wokolnych wosadach, je tučasnje wuznamny nabožny a narodny podawk.

Chodojtypalenje

30. apryla wotměwa so předewšěm na wjeskach, ale tež w Budyšinje chodojtypalenje. Wulke hromady drjewa so při ćmičkanju wotpaleja, na nich husto paslena chodojta. Nałožk słuša k tradiciji wućěrjenja zymy a wotwobaranja škodow na ludźoch a zwěrjatach.

Camprowanje

Wažny nałožk k póstnicam je camprowanje, kotrež je předewšěm w srjedźnej Łužicy jara woblubowane. Tule chodźa wosebje dorosćeni spěwajo camprować, zo bychu sej za swój póstniski swjedźeń dosć pjenjez, palenc a druhe dary nazběrali.

Serbske jutrownojejkace wiki

Serbske jutrownojejkace wiki, kóžde lěto stajnje pjeć tydźenjow do jutrow, je z wuměłskim debjenjom serbskich jutrownych jejkow za tysacy wopytowarjow atrakcija. Zajimcy móžeja wuměłcam přihladować, hdyž wone jejka wóskuja, barbja, polěruja abo najwšelakoriše mustry do skory škrabaja. Woni móžeja pak so tež sami w tych wšelakich technikach wupruwować a při nakupje ze šěrokeho poskitka jutrownych jejkow sej swoje wubrać.

Mejski štom

Na wsach wokoło Budyšina móžemy tohorunja stajenje meje a mejemjetanje dožiwić.

Prošerske spěwanja

W Hornjej Łužicy ćahnu dźěći a młodostni předrasćeni wot doma do domu a proša wo małe dary; powšitkownje dóstawaja słódkosće. Tute spěwanja wotměwaja so pola katolskich Serbow k póstnicam abo tež na swjateho Měrćina (11. nowembra).